અમદાવાદમાં મોદીએ બે દિવસમાં તો જામો પાડી દીધો, સરપંચ કાર્યક્રમમાં ‘ડાયરા’ ની રમઝટ તો ખેલ મહાકુંભમાં ‘ડીજે’ના તાલ!
વડાપ્રધાન નરેન્દ્ર મોદીએ બે દિવસ ગુજરાત આવીને રોડ શોની વણઝાર કરી દીધી. બીજીતરફ સરપંચથી સાંસદ સુધીના જનપ્રતિનિધિઓના કાર્યક્રમ, ખેલ મહાકુંભના ઉદઘાટન સહિતના કાર્યક્રમોમાં મોદીની હાજરી માત્રથી માત્ર ભાજપ જ નહીં આખા ગુજરાતમાં એક પ્રકારનું જોમ આવી ગયું છે. રાજ્યના છેવાડાના ગામડેથી માંડીને મોટા શહેરો સાથે મોદીએ અમદાવાદમાં જ અલગ અલગ રીતે સંપર્ક કર્યો હતો. સૌથી મજાની વાત એ બની કે સરપંચ સંમેલનમાં આવેલી જનતા માટે ડાયરાની રમઝટ હતી તો, ખેલ મહાકુંભમાં ડીજેનો તાલ જોવા મળ્યો. એટલું જ નહીં, સરપંચ સંમેલનમાં મોદીએ પોતીકુંપણું બતાવી ટિપિકલ ગુજરાતી ભાષામાં વર્ષો બાદ લોકો સાથે કનેક્ટિવિટી સાધી, તો ખેલ મહાકુંભમાં પ્રસંગોચિત હિન્દીમાં પ્રવચન કર્યું હતું.